«Զվարթնոց» օդանավակայանում ահաբեկչության մասին սուտ հաղորդում տալու դեպքով քրգործ է հարուցվել է

ՀՀ քննչական կոմիտեի Երեւանի քննչական վարչությունում հարուցվել է քրեական գործ ահաբեկչության մասին սուտ հաղորդում տալու դեպքի առթիվ։ Այս մասին yerkir.am-ը տեղեկացավ Քննչական կոմիտեի լրատվական ծառայությունից:

2016թ. մարտի 24-ին` ժամը 13:20-ին, «Զվարթնոց» օդանավակայանի շահագործման ծառայության կարգավարից ահազանգ է ստացվել, որ օդանավակայանի էլեկտրոնային փոստին հաղորդագրություն է ստացվել հնարավոր ահաբեկչության մասին։ Մասնավորապես՝ էլեկտրոնային նամակում նշվել է, թե մարտի 24-ին «ժամը 20:40-ին կպայթեցվի Մոսկվա մեկնող թիվ 558 չվերթի ինքնաթիռը, որից հետո կպայթեցվի «Զվարթնոց» օդանավակայանը»։

ՀՀ իրավասու մարմինների կողմից ձեռնարկված միջոցառումների և ստուգումների արդյունքում պարզվել է, որ ահաբեկչության մասին հաղորդումը սուտ է: Դեպքի առթիվ ՀՀ ՔԿ Երևան քաղաքի քննչական վարչությունում 25.03.2016թ. հարուցվել է քրեական գործ` ՀՀ քրեական օրենսգրքի 259-րդ հոդվածի հատկանիշներով: Կատարվում է նախաքննություն: