Հանրային ռադիոյին հատկացվող` Տերյան փողոցի շենքն իր արժեքից մի քանի անգամ ցածր է գնահատվել

Այսօր կառավարության նիստում կառավարությանն առընթեր պետական գույքի կառավարման վարչության պետ Արման Սահակյանը ներկայացրեց որոշման նախագիծ Երևանի Տերյան փողոց թիվ 2 հասցեում գտնվող` պետական սեփականություն  հանդիսացող 198,6  քառակուսի մետր մակերեսով շենքը և դրա սպասարկման համար անհրաժեշտ 0,0195 հեկտար հողատարածքը, որպես կամավոր գույքային ներդրում, գնահատված արժեքով  «Հայաստանի հանրային ռադիոընկերություն» ՓԲԸ-ի կանոնադրական կապիտալում ներդնելու մասին:

Հովիկ Աբրահամյանը հարցրեց. «98 միլիոն դրամ արժեքը ո՞նց եք գնահատել»:

Արման Սահակյանը պատասխանեց, որ դա շուկայական արժեքն է, և դրա մեջ են մտնում ամբողջ շենքը և հողը:

«Բա ամբողջ շենքը մենք ո՞նց ենք վաճառում 500  հազար դոլարով, եթե 200 քառակուսի մետրը մոտ 200 հազար դոլար է կազմում: Ստացվում է, որ էժան են գնահատել ամբողջ շենքը, ի՞նչն է պատճառը»,- հարցրեց վարչապետը: Արման Սահակյանը պատասխան չուներ:

Հովիկ Աբրահամյանն առաջարկեց այդ հարցը մանրամասն քննարկել, որովհետև հիշյալ տարածքից նաև «Հայֆիլմ»-ին ևս պետք է տարածք հատկացվի: