Ադրբեջանցիները կրակի տակ են պահում Բաղանիս-Ոսկեպար ճանապարհին գնդակոծված ռուսական բեռնատարը

Արդեն երկու օր է՝ չի հաջողվում դուրս բերել Բաղանիս-Ոսկեպար ճանապարհին ադրբեջանական գնդակոծությունից վնասված ռուսական բեռնատարը: Yerkir.am-ի տեղեկություններով՝ նախօրեին Նոյեմբերյանից «ԿՌԱԶ» են բերել, որի միջոցով փորձել են տեղափոխել բեռնատարը, սակայն հակառակորդը կրակահերթ է բացել ոչ միայն դրա, այլև «ԿՌԱԶ»-ի ուղղությամբ, ինչի արդյունքում վնասվել է «ԿՌԱԶ»-ի անվադողը: Երեկ գիշեր մեծ դժվարությամբ հաջողվել է դուրս բերել «ԿՌԱԶ»-ը:

Նշենք, որ այս պահի դրությամբ հիշյալ ճանապարհահատվածը բաց է: Ուշագրավ է, որ այս ընթացքում ճանապարհով ընթացող մեքենաների ուղղությամբ հակառակորդը կրակոցներ չի արձակում, սակայն, երբ փորձում են մոտենալ գնդակոծված բեռնատարին, ակտիվանում է:

Yerkir.am-ի տեղեկություններով ՝ ռուսական բեռնատարի վարորդը, ով ՌԴ քաղաքացի է ,այս հարցով դիմել է ՌԴ դեսպանատուն:

Հիշեցնենք, որ հիշյալ դեպքի կապակցությամբ ավտոմեքենայի վարորդը՝ Ա.Ելդզարովը, ոստիկանության Նոյեմբերյանի բաժնում հաղորդում էր տվել: Նույն օրը ՀՀ քննչական կոմիտեի Տավուշի մարզային քննչական վարչությունում հարուցվել է քրեական գործ՝ ՀՀ քրեական օրենսգրքի 34-104-րդ հոդվածի 2-րդ մասի 6-րդ, 13-րդ կետերով և 185-րդ հոդվածի 2-րդ մասի 1-ին և 4-րդ կետերով (սպանության փորձ, հրկիզման, պայթյունի կամ հանրավտանգ այլ եղանակով, ազգային, ռասայական կամ կրոնական ատելության կամ կրոնական մոլեռանդության շարժառիթով գույքը դիտավորությամբ վնասելը): Ա.Ելդզարովը ճանաչվել է տուժող: Նա կրակոցների հետևանքով մարմնական վնասվածքներ չի ստացել: