Զրպարտել է

Yerkir.am-ի հարգելի ընթերցողներ

Մենք թեեւ որոշում ենք կայացրել այլեւս չանդրադառնալ Ադրբեջան փախած Վահան Մարտիրոսյանի թեմային, սակայն որոշակի փաստերի ի հայտ գալու պատճառով (որոնց մասին առաջիկայում պաշտոնական հայտարարություններ կլինեն) ցանկանում ենք տեղեկացնել, որ 2014 թ. հոկտեմբերի 6-ին Վահան Մարտիրոսյանի` մեզ հետ զրույցում արած հայտարարության բովանդակությունը չի համապատասխանում իրականությանը: Նշենք, որ Վահան Մարտիրոսյանը հայտարարել էր, թե ոստիկանության կողմից ենթարկվում է ճնշումների մամուլում որպես Հասմիկ ներկայացած մի քաղաքացու բռնաբարության գործի վերաբացմանն ուղղված իր գործունեության պատճառով: Նա, մասնավորապես, պատմել էր, թե իբր ոստիկանության կողմից իր և մի աղջկա գաղտնի տեսանկարահանել են եւ դրանով էլ իբր շանտաժի ենթարկել իրեն` ստիպելով հրաժարվել այդ գործից: Վահանի պնդմամբ` այդ աղջիկը իբր համագործակցել էր ոստիկանության հետ:

Ապացուցվել է, սակայն, որ դա զրպարտություն է եղել նրա կողմից, ավելին` հենց այդ աղջիկն է նրա կողմից ենթարկվել շանտաժի, ինչի արդյունքում ստիպված է եղել տանել անանուն զրպարտանքը:

Ավելին՝ պարզվում է, որ գաղտնի տեսանկարահանման պատմությունն ամբողջությամբ հորինված է եղել Վահանի կողմից, որպեսզի «Հասմիկի» ազգակցականների մոտ հալածյալի պատրանք ստեղծի ` ավելի մեծացնելով բռնաբարության գործի հանրայնացման անվան տակ այդ ազգականից կորզվող գումարի չափը: Զրպարտանքի ենթարկվածի անունը, ելնելով մի շարք հանգամանքներից, չենք հրապարակում:

Տեղեկացնում ենք նաեւ, որ նյութը հեռացված է կայքից: