Բրազիլիայի անձնագիր ունեցող քաղաքացիները կազատվեն ՀՀ մուտքի վիզա ձեռք բերելու պահանջից

Կառավարության` օգոստոսի 31-ի նիստում ներառված է որոշում Բրազիլիայի Դաշնային Հանրապետության սովորական անձնագիր կրող քաղաքացիներին ՀՀ մուտքի վիզա ձեռք բերելու պահանջից ազատելու մասին:

ՀՀ կառավարության որոշման նախագծի ընդունումը պայմանավորված է Բրազիլիայի Դաշնային Հանրապետության հետ փոխադարձության սկզբունքով սովորական անձնագիր կրող անձանց մուտքի վիզայի պահանջից ազատելու մասին փոխադարձ պայմանավորվածությամբ:

Հարավամերիկյան երկրներից երկուսի` Արգենտինայի և Ուրուգվայի հետ Հայաստանի Հանրապետությունն արդեն ունի առանց մուտքի արտոնագրի ռեժիմ:

2002թ. մայիսի 7-ին Հայաստանի և Բրազիլիայի կառավարությունների միջև ստորագրվել է համաձայնագիր, որը սահմանում է առանց մուտքի արտոնագրի ռեժիմ դիվանագիտական անձնագրեր կրող անձանց համար:  Սույն որոշման ընդունմամբ` փոխադարձության սկզբունքով վիզայի պահանջից կազատվեն նաև սովորական անձնագրեր կրող քաղաքացիները:  Բրազիլիայի հետ նման ռեժիմի սահմանումը կխթանի երկու երկրների միջև երկկողմ հարաբերությունները և կնպաստի բարեկամական հարաբերությունների զարգացմանը և ամրապնդմանը: 

Կարգավորման նպատակն է սովորական անձնագրեր կրող` Բրազիլիայի քաղաքացիների համար փոխադարձության սկզբունքի հիման վրա սահմանել առանց մուտքի արտոնագրի ռեժիմ` ՀՀ տարածք մուտք գործելու օրվանից 90 օրը չգերազանցող  ժամանակահատվածով, որը հնարավոր է երկարաձգել 90 օր ժամանակահատվածով: