Տավուշի դատախազն ու ոստիկանապետը հանդիպել են միջպետական ճանապարհը փակած գյուղացիներին

Արդեն տեղեկացրել ենք, որ Իջևան քաղաքի տասնյակ բնակիչներ, Կոթիի, Ոսկեպարի և հարևան այլ գյուղերի 200-ից ավելի գյուղացիներ, ի նշան բողոքի, փակել են Բաղանիս-Ոսկեպար ավտոճանապարհը: Պատճառը Տավուշի մարզի ընդհանուր իրավասության դատարանի այսօրվա կայացրած վճիռն է, որով Իջևանի նախկին ոստիկանապետ Անդրանիկ Ազիբեկյանը դատապարտվեց 5 տարվա ազատազրկման:

Yerkir.am-ի հետ զրույցում Բաղանիսի գյուղապետ Նարեկ Սահակյանը տեղեկացրեց, որ այս պահի դրությամբ միջպետական նշանակության ավտոճանապարհը բաց է, պարզապես Կոթիի մի խումբ բնակիչներ այնտեղ են, բայց երթևեկելի հատվածում չեն: «Դեպքի վայրում են  մարզային  ոստիկանության պետը, դատախազը: Կոթիի բնակիչներն են միայն այդտեղ: Ժողովրդի մեծ մասն արդեն գնացել է, իսկ մյուս մասն էլ դուրս է եկել ճանապարհի երթևեկելի հատվածից»,- ասաց գյուղապետը:

Ոսկեպարի գյուղապետ Երվանդ Եգանյանն էլ մեզ հետ զրույցում ասաց, որ իրավիճակն այս պահին հանդարտվել է: