Աշխարհում ընտրությունների նախօրեին նման դեպքեր լինում են. Էրդողանը` Տիգրանակերտում տեղի ունեցած պայթյունների մասին

Թուրքիայի նախագահ Ռեջեփ Թայիփ Էրդողանը հայտարարությամբ է հանդես եկել երեկ քրդամետ Ժողովուրդների դեմոկրատական կուսակցության` Տիգրանակերտում անցկացված հանրահավաքի ժամանակ տեղի ունեցած պայթյունների մասին. տեղեկացնում է Haberturk-ը:

«Մինչ այսօր ոչ ցանկալի դեպքեր տեղի ունեցան: Սղերդում սպանվեց երկու մարդ, և եղան նման այլ սպանություններ: Այս բոլորը հաշվի առնելով` կարող ենք ասել, որ խորհրդարանական ընտրությունների վրա, դժբախտաբար, բացասական ազդեցություններ եղան: Սակայն ընտրություններից ուղիղ երկու օր առաջ տեղի ունեցած այս պայթյունների նպատակը ընտրությունների վրա ստվեր գցելն է»,-ասել է Թուրքիայի նախագահը:

Նշելով, որ ցավակցելու նպատակով ընկերների միջոցով փորձել է կապ հաստատել քրդամետ կուսակցության ղեկավար Սելահաթթին Դեմիրթաշի հետ, սակայն նա անհասանելի է եղել և լավ է, որ նա կկարողանա այդ մասին իմանալ այս հայտարարության միջոցով, Էրդողանը հայտնել է նաև, որ ընտրություններն ամեն դեպքում տեղի են ունենալու: Նրա խոսքով` անվտանգության բոլոր միջոցները ձեռնարկված են, և ինքը հուսով է, որ ընտրությունները կիրականացվեն լավ պայմաններում:

«Նման դեպքեր միշտ էլ տեղի են ունենում: Սա միայն Թուրքիայում տեղի ունեցող դեպք չէ: Աշխարհում ընտրությունների նախօրեին նման դեպքեր լինում են»,- ասել է Էրդողան ու ցավակցել մահացածների ընտանիքներին, նաև շուտափույթ ապաքինում մաղթել վիրավորներին: