Սերյոժա Սարգսյանի հերթն էր` հոտը դաշտ տանելու

Տեղեկացրել էինք, որ երեկ հայ-ադրբեջանական սահմանին իրավիճակը լարված է եղել. ժամը 17:30 ի սահմաններում Տավուշի մարզի Բաղանիս գյուղի հատվածում ադրբեջանական զինված ուժերի ստորաբաժանումները դիվերսիոն հարձակման փորձ են իրականացրել: Փոխհրաձգության ընթացքում զոհվել է տարածքում գտնվող հովիվ Սերյոժա Նիկոլայի Սարգսյանը` ծնված 1935 թ: Սերյոժա Սարգսյանը Ոսկեվան գյուղի բնակիչ էր:

Yerkir.am-ի հետ զրույցում Ոսկեվանի գյուղապետ Սերյոժա Ալեքսանյանը հայտնեց, որ գյուղում 4-5 ընտանիք միացել և հերթով անասուններին տանում են դաշտ` արածեցնելու: Երեկ Սարգսյանի հերթն է եղել:

«Սարգսյանն ավանդական հայ ընտանիքից է` կինը, տղան և երկու տղա թոռներն ապրում են մի տան մեջ, գյուղում: Հաշտ ու համերաշխ ընտանիք է»,- ասաց Ալեքսանյանը:

Գյուղապետը տեղեկացրեց նաև, որ մինչև լուսադեմ կրակոցներ են եղել, սակայն լուսադեմից հետո իրավիճակը կայունացել է: Գյուղը նյութական վնասներ չի կրել: