Որ ժողովուրդը կանգնի, ո՞ւր եք փախչելու, ո՞ր մկան ծակը. Լևոն Զուրաբյան

Վանաձորում երեք քաղաքական ուժերի կողմից հրավիրված իրազեկման հանրահավաքի ժամանակ  ելույթ ունեցավ ՀԱԿ խմբակցության ղեկավար Լևոն Զուրաբյանը, ով հայտարարեց, որ հավաքվել են իշխանափոխություն անելու համար:

Նշենք, որ եղանակը Վանաձորում անձրևային էր, և պատգամավորը կոչ արեց հավաքվածներին` հոկտեմբերի 10-ին Երևանի հանրահավաքին մասնակցելիս էլ վերցնել անձրևանոցներ:

«Անձրևը դարձել է իշխանափոխության դրոշը,  խորհրդանշանը»,- ասաց Լևոն Զուրաբյանը:

Նա նշեց, որ ընդդիմության 12 կետերի մեջ մի կետ կա, որը վերաբերում է մենաշնորհներին: «Ուրեմն մենք պահանջում ենք, որ վերջ տրվեն մենաշնորհներին: Եվ Չեխիայում մի կին հարցրեց Սերժ Սարգսյանին` Դուք ո՞նց եք նայում նրան, որ շաքարը բերում է մեկ մարդ: Ու հիմա,  խելքին աշեցեք,  թե ինչ պատասխան է տալիս, ասում է` բա Հայաստանի նման փոքր երկրում քանի՞ հոգի պետք է շաքար ներկրի: Ա'յ ախպեր,  քո նման խելք ունեցող արդեն մեկ նախագահն էլ  շատ է Հայաստանի համար»,- ասաց Լևոն Զուրաբյանը:

Նրա խոսքով` միայն շաքարի մենաշնորհը վերացնելուց հետո շաքարի գինը 2.5 անգամ նվազելու է,  նույնը վերաբերելու  է բենզինին, սննդամթերքին, դրա համար էլ, ըստ Զուրաբյանի,  պետք է քշել իշխանություններին:

«Ո՞նց է ստացվել, որ սրանք մնում են: Իրենց մնալու համար գտել են մի արդարացում: Նրանք ասում են` այո', մենք թալանում ենք, կազինո ենք գնում, ամեն  ինչ էլ անում ենք, բայց զատո Ղարաբաղը պահում ենք` դիվանագիտական ասպարեզում կոշտ դիրքորոշումներով: Բայց ես նոր եմ վերադարձել ԵԽԽՎ պատվիրակության հետ Ստրասբուրգից,  որտեղ հայկական դիվանագիտությունը  կրել է միգուցե իր ամենախայտառակ պարտությունը: ԵԽԽՎ-ն որոշել է,  որ պատրաստելու է զեկույց, որը կոչվելու է «Բռնության ահագնացումը  ԼՂ-ում և Ադրբեջանի այլ օկուպացված տարածքներում»: Այս վերնագրից հետևում է, որ այսուհետ ԵԽԽՎ-ն ԼՂ-ն համարում է Ադրբեջանի օկուպացված տարածք, մի բան, որ որևէ միջազգային  փաստաթղթում ձևակերպված չի եղել, նման բան երբեք չի եղել: Եվ  սրա միակ պատասխանատուն այս ապաշնորհ, անգրագետ ու թալանչի իշխանություն է: Սրանք Ղարաբաղը պահողը չեն, սրանք Ղարաբաղը ծախողն են  տվողն են, մեր պաշտպանունակությունը քանդողն են: Էնպես են անում, որ մեր երկիրը կորցնում է դիմակայելու ռեսուրսները: Նրանք անգամ ուժային կառույցների աջակցությունը չունեն: Այնպես որ` մարտի 1-ով Հովիկ Աբրահամյանը, Սերժ Սարգսյանը թող մեզ չվախեցնեն: Հլը տեսնեմ, որ ժողովուրդը  կանգնի, ո՞ւր եք փախնելու, ո՞ր մկան ծակը»:

Պատգամավորը նշեց, որ  հոկտեմբերի 10-ին Երևանում պետք է հնչի միայն մեկ կարգախոս` «Սերժի'կ, հեռացի'ր»: