Օրեցօր աճում է իմ հակակրանքը համացանցի նկատմամբ. Էրդողան

Թուրքիայի նախագահ Ռեջեփ Թայիփ Էրդողանը հանդիպել է Լրագրողների պաշտպանության կոմիտեի և Մամուլի միջազգային ինստիտուտի անդամների հետ:

Ըստ T24-ի՝ Էրդողանը, ով կին լրագրողներին և լրատվամիջոցներին իր հայտարարությունների թիրախն է դարձրել և  այդ պատճառով բազմիցս քննադատության է արժանացել խոսքի ազատության պաշտպանների կողմից, հանդիպման ընթացքում դարձյալ չի թաքցրել իր՝հակակրանքը համացանցի նկատմամբ:

Նա ներկաներին մեղադրել է «Գեզի այգու իրադարձությունները, կոռուպցիայի գործողությունը և առևանգման մասին լուրերը խեղաթյուրելու և չափազանցնելու» մեջ: Էրդողանը, հայտնելով համացանցում տարածված տեղեկությունները վերահսկելու` պետության ջանքերի մասին, ասել է. «Օրեցօր աճում է իմ հակակրանքը համացանցի նկատմամբ»:

Հիշեցնենք, որ ոչ վաղ անցյալում Էրդողանը երկրում արգելափակել էր Youtube-ը, այն բանից հետո, երբ իր և մի շարք քաղաքական հայտնի գործիչների անունները շրջանառվել էին կոռուպցիայի և կաշառակերության գործի կապակցությամբ: