Երասխի ուղղությամբ կրակած դիպուկահարների դիակները «ջրի երես են» դուրս գալիս

«Ռեգնում» գործակալությունն այսօր, վկայակոչելով ադրբեջանական լրատվամիջոցները, տեղեկատվություն էր տարածել, թե Նախիջեւանի Ինքնավար Հանրապետության Ջուլֆայի շրջանի Լակադաղ գյուղի ուղղությամբ հայկական զինված ուժերը հարձակման են անցել, ու ադրբեջանական կողմից զոհեր կան:

Թե ի՞նչ է կատարվում հայ-ադրբեջանական զորքերի շփման գծում, փորձեցինք ճշտել ՀՀ պաշտպանության նախարարի մամլո խոսնակ Արծրուն Հովհաննիսյանից, ով Yerkir.am-ին այդ կապակցությամբ ասաց. «Դա աբսուրդ է, չկա նման բան, դա ապատեղեկատվություն է»:

Նման սադրիչ տեղեկատվությամբ ադրբեջանական կողմը փորձում է սրել իրավիճակը հայ-ադրբեջանական զորքերի շփման գծում, նաեւ ինչպես ենթադրվում էր, ըստ էության, ադրբեջանական կողմը հայտնում է այն զոհերի մասին, որ ունեցել էր Երասխի ուղղությամբ կատարած ոտնձգությունների օրը:

Հիշեցնենք` Yerkir.am-ը օրեր առաջ գրել էր, որ Երասխ գյուղի բնակիչները պատմել են, որ մայիսի 5-ին, երբ հակառակորդը դիպուկահար կրակ արձակեց Երասխի ուղղությամբ, ինչի արդյունքում հայկական կողմից երկու զոհ ունեցանք, հայ զինվորականների պատասխան կրակից հակառակորդն, ամենայն հավանականությամբ, 1-5 զոհ ունեցավ: Գյուղացիները նշում էին, որ հայ զինվորները նկատել են հայկական դիրքերի ուղղությամբ դիպուկահար կրակ բացած 6-7` հատուկ նշանակության դիպուկահարների, որոնք պատրաստվել են հեռանալ սեւ ջիփով, ու գնդացրային կրակ ենբացել ավտոմեքենայի ուղղությամբ:

Ըստ ականատեսների` մեքենայից ընդամենը 3 հոգի են հասցրել դուրս գալ, որոնցից մեկն ընկել ու մնացել է անշարժ, իսկ երկուսը հասցրել են փախչել ու թաքնվել մոտակա եղեգնուտում: Գյուղացիների համոզմամբ` նման կրակից հետո ադրբեջանցիների ջիփի մեջ գտնվողներից եւ ոչ մեկը պետք է որ ողջ մնացած չլիներ: Նրանք վստահեցնում էին, որ ադրբեջանական կողմը առնվազն 1 զոհ ունի, եթե ոչ 5…