ԵԱՀԿ համանախագահները հանդիպեցին Ալիեւի հետ

Ադրբեջանի նախագահ Իլհամ Ալիևն այսօր ընդունել է ԵԱՀԿ Մինսկի խմբի համանախագահներ Իգոր Պոպովին (Ռուսաստան), Ջեյմս Ուորլիքին (ԱՄՆ), Ժակ Ֆորին (Ֆրանսիա) և Պիեռ Անդրեին՝ ֆրանսիացի նոր համանախագահին, որն իր լիազորությունները կստանձնի առաջիկա ժամանակաշրջանում. հայտնում է АПА-ն: Նրանց հետ է նաև ԵԱՀԿ գործող նախագահի անձնական ներկայացուցիչ Անժեյ Կասպրշիկը։

Հանդիպման ընթացքում կարծիքներ են փոխանակվել ԼՂ  հակամարտության կարգավորման և դրա հեռանկարների վերաբերյալ։

Հիշեցնենք, որ ԵԱՀԿ Մինսկի համանախագահները տարածաշրջան էին այցելել նաև մայիսի 19-ին։ Սակայն այն ժամանակ, ինչպես հեգնանքով երեկ գրել էր ադրբեջանկան haqqin.az պարբերականը, ստիպված էին բավարարվել միայն ՊՆ ղեկավարի հետ հանդիպմամբ. Ալիևը և Մամեդյարովն արտերկրում էին: Ադրբեջանական կողմն այդ կերպ էր փորձել ցույց տալ իր դժգոհությունը համանախագահների գործունեությունից: