Սիրիայում սկսվում է նախագահական ընտրությունների քարոզարշավը

Այսօրվանից քաղաքացիական պատերազմի մեջ գտնվող Սիրիայում սկսվում է նախագահական ընտրությունների քարոզարշավը: Ընտրությունները, ըստ Al Arabiya հեռուստաընկերության, տեղի կունենան հունիսի 3-ին:

Երկրի խորհրդարանի նախագահ Մուհամմեդ ալ Լահհամը հայտարարել է, որ իրենք թույլ չեն տա, որ քաղաքացիական պատերազմը, արտաքին դրությունը խոչընդոտեն նախագահական ընտրությունների կայացմանը:

Հիշեցնենք, որ այս տարվա մարտին սիրիական խորհրդարանն ընդունել է ընտրությունների մասին նոր օրենք, որը թույլ է տալիս երկրի պատմության մեջ առաջին անգամ մի քանի թեկնածուների մասնակցել ընտրություններին: Թեկնածուները պետք է իրենց թեկնածությունը ներկայացնեն խորհրդարանին և ստանան երկրի 250-տեղանոց օրենսդիր մարմնի` առնվազն 35 պատգամավորների աջակցությունը:

Սիրիայում նախագահն ընտրվում է յոթ տարի ժամկետով: Գործող նախագահ Բաշար Ասադը պաշտոնավարում է 2000 թվականից, իսկ մինչ այդ երեսուն տարի Սիրիան ղեկավարում էր նրա հայրը` Հաֆեզ ալ Ասադը: