Դավիթ Քոչարյանը վայր է դրել ոչ թե կուսակցական տոմսը, այլ միայն պատգամավորական մանդատը

ԱԺ ԲՀԿ խմբակցության պատգամավոր Դավիթ Քոչարյանը դեռևս Հայաստանում չէ: Նրա գալուց հետո միայն պարզ կլինի, թե ինչ պատճառով է նա ապրիլի 11-ին դիմում ներկայացրել ԱԺ նախագահին` հրաժարվելով պատգամավորական մանդատից: Yerkir.am-ի հետ զրույցում ԱԺ ԲՀԿ խմբակցության քարտուղար Նաիրա Զոհրաբյանը նշեց, որ տարածվել է ապատեղեկատվություն, թե իբր Դավիթ Քոչարյանը հրաժարվել է կուսաակցությանը անդամությունից:

«Մենք Դավիթ Քոչարյանից չենք ստացել դիմում «Բարգավաճ Հայաստան» կուսակցությունից դուրս գալու վերաբերյալ: Թե որտեղի՞ց դրվեց շրջանառության մեջ այն թեզը, թե Դավիթ Քոչարյանը կուսակցությունից է դուրս եկել, ու դա համառորեն տիրաժավորվում է, ինձ հայտնի չէ»,- ասաց Նաիրա Զոհրաբյանը:

Նա նաև նշեց, որ Դավիթ Քոչարյանը մեծամասնական ընտրակարգով է ընտրվել պատգամավոր, և եթե նա 15-օրյա ժամկետում հետ չվերցնի պատգամավորական մանդատից հրաժարվելու վերաբերյալ իր դիմումը, ապա կանցկացվի նոր ընտրություն տվյալ մեծամասնական տարածքում: