Արդարադատության նախարարության աշխատակիցները ծեծել են քաղաքացուն. ձայնագրություն

32-ամյա Արման Գասպարյանը դիմել է Մարդու իրավունքների պաշտպանին և հայտնել, որ արդարադատության նախարարության աշխատակիցներն իրեն ծեծի են ենթարկել և հայհոյել: Այս մասին հայտնում է ՄԻՊ գրասենյակը:

 

Քաղաքացին պաշտպանին է ներկայացրել նաև ձայնագրություն, որը վկայում է միջադեպի մասին: Արմանը պատմել է, որ մարտի 24-ին` ժամը 13:00-ի սահմաններում, իր մեքենայով ընկերոջը տարել է արդարադատության նախարարության այլընտրանքային պատիժների կատարման շենք: Կառույցի աշխատակիցները ընկերոջն ընդունելուց հետո հրավիրել են նրան սենյակ, որտեղ ներկա են եղել 4-5 համազգեստով անձինք և բռնություն գործադրել նրա հանդեպ:

 

Այս կապակցությամբ ՄԻՊ-ը դիմել է Հատուկ քննչական ծառայություն և արդարադատության նախարարություն` միջնորդելով համապատասխան միջոցներ ձեռնարկել և տեղեկացնել արդյունքների մասին:

 

Արման Գասպարյանի համաձայնությամբ հրապարակում ենք համապատասխան ձայնագրությունը: