Վաղը սննդամթերքի անվտանգության պետական ծառայությանն ահագին փող են տալու

Վաղվա նիստում կառավարության հաստատմանը կներկայացվի գյուղատնտեսության նախարարության սննդամթերքի անվտանգության պետական ծառայության նյութական խրախուսման եւ համակարգի զարգացման ֆոնդի արտաբյուջետային հաշվի միջոցների ծախսման` 2014 թվականի նախահաշիվը:

Ըստ նախահաշվի' 2014 թվականի ընթացքում գյուղատնտեսության նախարարության սննդամթերքի անվտանգության պետական ծառայության նյութական խրախուսման և համակարգի զարգացման ֆոնդին կտրամադրվի 289 միլիոն 113 հազար դրամ գումար:

Այդ գումարից մոտ 202 միլիոն 979 հազար դրամը պետք է ուղղվի պարգեւատրումներին, դրամական խրախուսումներին եւ հատուկ վճարներին, իսկ մնացածը' տարբեր ծառայությունների, նյութերի ձեռքբերմանը, գործուղումների, շենք-շինությունների ու սարք-սարքավորումների վերանորոգմանն ու պահպանմանը, պարտադիր վճարներին եւ այլն:

Կառավարությունը վաղվա մեկ այլ որոշմամբ` նույն  սննդամթերքի անվտանգության պետական ծառայության նոր մասնաշենքում (հասցե՝ ք. Երևան, Կոմիտասի 49/2) տեղակայված բաշխիչ վահանակների և օդորակիչների վերանորոգման նպատակով նախատեսում է հատկացնել եւս 1 միլիոն 200.0 հազար դրամ, որից էլեկտրամոնտաժային աշխատանքների համար պլանավորվում է ծախսել 900 հազար, իսկ շենքերում տեղակայված  էլեկտրական սարքերի վերանորոգման և պահպանման ծառայությունների համար' 300 հազար դրամ: