Մարտի 2-ին Երևանում մեկնարկելու է շախմատի Եվրոպայի առաջնությունը

Մարտի 2-15-ը Երեւանում անցկացվելու է Եվրոպայի 15-րդ անհատական առաջնությունը: Մրցաշարը նվիրված է աշխարհի 9-րդ չեմպիոն Տիգրան Պետրոսյանի հիշատակին: Այս տարի լրանում է Պետրոսյանի ծննդյան 85-ամյակը. տեղեկացնում է armchess.am-ը:

Բացման արարողությունը կկայանա մարտի 2-ին Ա. Սպենդիարյանի անվան օպերայի եւ բալետի ազգային ակադեմիական թատրոնում: Սկիզբը` ժամը 21:00-ին:

Մրցաշարն անցկացվում է շվեյցարական մրցակարգով, 11 տուրով: Խաղերը կկայանան «Էլիտ պլազա» բիզնես կենտրոնում մարտի 3-15-ը: Սկիզբը` ժամը 15:00-ին, վերջին տուրը` 14:00-ին: Մարտի 9-ը հանգստյան օր է:

Մրցաշարին մասնակցում է 27 երկրից 270 շախմատիստ, այդ թվում` 130 գրոսմայստեր: Միջազգային կոչումներ ունեցող մասնակիցների թիվն անցնում է 200-ից:

Ամենամեծ թվով մասնակիցներ ներկայացնում են Հայաստանը (մոտ 80), Ռուսաստանը (53), Վրաստանը (17), Իսրայելը (17), Ուկրաինան (13), Թուրքիան (10):

Կանոնադրության համաձայն` առաջին 23 տեղերը գրաված շախմատիստներն իրավունք են ստանում մասնակցելու Աշխարհի գավաթին:

Մրցանակային հիմնադրամը 160 հազար եվրո է: Սահմանված են 25 հիմնական եւ 15 հատուկ մրցանակներ: Առաջին մրցանակակիրը կստանա 20 հազար եվրո: Միավորների հավասարության դեպքում մրցանակները բաժանվում են հավասարապես:

Գլխավոր մրցավարն է միջազգային կարգի մրցավար Աշոտ Վարդապետյանը (Հայաստան): Վճռաբեկ հանձնաժողովի նախագահն է գրոսմայստեր Սմբատ Լպուտյանը (Հայաստան), անդամները` գրոսմայստեր Գիորգի Գիորգաձեն (Վրաստան) եւ միջազգային կարգի մրցավար Գենադի Նեսիսը (Ռուսաստան):