Ուշագրավ մանրամասներ ԱԱԾ տնօրենի տեղակալի պաշտոնանկության մասին

Օրերս աշխատանքից ազատվեց ԱԱԾ տնօրենի առաջին տեղակալ Ռոմիկ Հարությունյանը, և, բացի պաշտոնական տեղեկատվությունից, որևէ այլ պատճառ չնշվեց:

«Առաջին լրատվական»-ի տեղեկություններով, սակայն, նրա պաշտոնանկության հիմնական պատճառն այն է, որ նա մի խոշոր գործի շրջանակներում շատ է զայրացրել Սերժ Սարգսյանին, մասնավորապես՝ նրան չի զեկուցել գործի որոշ ուշագրավ մանրամասներ: Բացի այդ` Հարությունյանը մի քանի տարբեր գործերով «տանիք է կանգնել» որոշ պաշտոնյաների, ինչպես նաև կատարել ռուսաստանցի մի հեղինակության հանձնարարություններ:

«Առաջին լրատվական»-ի տեղեկություններով՝ այս գործի շրջանակներում օրերս աշխատանքից ազատվել է նաև ԱԱԾ գլխավոր վարչության պետի տեղակալ Տիգրան Աղաջանյանը: Նա ուղարկվել է կադրերի ռեզերվ:

Նույն տեղեկությունների համաձայն՝ Աղաջանյանի պաշտոնանկությունը ևս անմիջականորեն կապված է Ռոմիկ Հարությունյանի հետ: Հենց վերջինս է զեկուցագիր գրել «վերևներին» և ներկայացրել փորփրված գործի մանրամասները՝ հույս ունենալով, որ ինքը ջրից չոր դուրս կգա, եթե ոչ, իհարկե, առաջխաղացում կունենա: Սակայն դրանից հետո Աղաջանյանը ևս հրաժեշտ է տվել աշխատանքին:

«Առաջին լրատվական»-ը փորձեց ԱԱԾ լրատվական ծառայությունից ճշտել Աղաջանյանի՝ աշխատանքից ազատվելու հետ կապված որոշ մանրամասներ: Սակայն բոլոր հարցերին տրվեց մեկ պատասխան՝ ԱԱԾ կադրային հարցերի հետ կապված որևէ ինֆորմացիա հրապարակման ենթակա չէ:

Այս հանելուկային գործում, պարզվում է, միայն ԱԱԾ աշխատակիցները չէ, որ ներգրավված են: Ռոմիկ Հարությունյանի պաշտոնանկության պատճառ դարձած գործում ներգրավված է կամ ինչ-որ ձևով  դրան առնչվում է նաև էներգետիկայի և բնական պաշարների նախարար Արմեն Մովսիսյանը:

Շարունակությունը` այստեղ: