''Փյունիկը'' բաց մարզում անցկացրեց

Այսօր Երևանի «Փյունիկ»-ը  ֆուտբոլի ակադեմիայում բաց մարզում անցկացրեց:  Մարզումից հետո Կամո Հովհաննիսյանը, Աղվան Պապիկյանը և  Արթուր Յուսպաշյանը հանդիպեցին լրագրողների հետ:

Կամո Հովհաննիսյան. - Մարզումներն անցնում են հաճելի մթնոլորտում: Ամեն ինչ ընթանում է բնականոն հունով: Նոր մարզչի գլխավորությամբ`  4 մարզում ենք անցկացրել, նկատելի փոփոխություններ չկան: Մրցաշրջանի 2-րդ հատվածից միայն դրական սպասելիքներ ունենք, կանենք ամեն ինչ, որ բարելավենք մեր դիրքերը մրցաշարային աղյուսակում:

«Հիմա լավ մարզավիճակում եմ: Սարգիս Հովսեփյանի գլխավորությամբ` անցկացրել եմ 1 մարզում և լավ տպավորություններ ունեմ: Չեմ կարող ասել, թե ինչու առաջնությունը լավ սկսելուց հետո թիմը անկում ապրեց: Ֆուտբոլ է, և ամեն ինչ հնարավոր է», -լրագրողներին ասաց Աղվան Պապիկյանը:

Արթուր Յուսպաշյանի խոսքերով` մարզումները թիմը լավ տրամադրվածությամբ է սկսել, թիմում ամեն ինչ լավ է: «Առաջնության 2-րդ հատվածում յուրաքանչյուր խաղ խաղալու ենք հաղթանակի համար: Մեր երիտասարդ ֆուտբոլիստների փորձի պակասը զգացնել է տալիս, ինչի պատճառով ոչ այդքան հաջող անցկացրեցինք առաջնության առաջին կեսը»,- ասաց ֆուտբոլիստը:

Խոսելով Մանոյանի բացակայության մասին` Յուսպաշյանը նշեց, որ  Մանոյանը մեր առաջատար ֆուտբոլիստներից է, և  նրա բացակայությունը իրենց  համար ծանր է, բայց ամեն ինչ կանեն, որպեսզի արժանի փոխարինող գտնեն, մինչև նա բուժվի և շարք վերադառնա: