Պետք է հասկանալ, թե ի՞նչ է կատարվում ոսկու շուկայում. Տիգրան Սարգսյան

Կառավարության այսօրվա նիստը վարչապետ Տիգրան Սարգսյանը բացեց` անդրադարձ կատարելով նախորդ շաբաթ կառավարության շենքի մոտ «Վաղարշ եւ որդիներ կոնցեռնի»` ոսկու շուկայի աշխատակիցների կազմակերպած բողոքի ցույցին:

Վարչապետը նշեց, որ սա առաջին դեպքը չէ, այդ պատճառով էլ ինքն անդրադառնում է այս խնդրին: Ոսկու շուկայի աշխատակիցները պարբերաբար կառավարության շենքի մոտ ցույցեր են կազմակերպում, եւ բողոքների պատճառները շատ տարբեր են: Տիգրան Սարգսյանը նշեց, որ էկոնոմիկայի նախարարության շուկաների վերահսկողության տեսչությունը իրեն ծանոթացրել է այս խնդրի տեղեկանքի հետ, եւ այն տեղեկատվությունը, որ զետեղված է տեղեկանքում բացարձակապես չի համապատասխանում այն տեղեկատվությանը, որը տարածել են ԶԼՄ-ները:

«Միեւնույն ժամանակ, տեսչության պետն ինձ տեղեկացրեց, որ այս տարվա ծրագրով պլանավորված է, որ դեկտեմբերի 10-ին նրանք համալիր ստուգում պետք է իրականացնեն ոսկու շուկայում` հաշվի առնելով այն հանգամանքը, որ մենք ձեզ հետ միասին տեսչական բարեփոխումների շրջանակներում որդեգրել ենք այն սկզբունքը, որ տնտեսվարող սուբյեկտների անհարմարությունները պետք է հասնեն մինիմումի: Նշանակում է, որ մեր տարբեր տեսչական մարմինները ստուգումների ժամանակ իրենց գործողությունները պետք է դարձնեն համադրելի, որպեսզի հաճախակի այնտեղ ստուգումեր չանեն»,- նշեց վարչապետը:

Տիգրան Սարգսյանը հավելեց, որ բոլոր բողոքները, որ  կառավարությունը ստանում է ոսկու շուկայի աշխատակիցներից եւ հաճախորդներից, բազմազան են` սկսած աշխատանքային պայմաններից, հակահրդեհային եւ սանիտարական վիճակից: Հաճախորդները բողոքում են նաեւ, որ ձեռք են բերում իրեր առանց համապատասխան դրոշմների, իրերի որակի վերաբերյալ կան լուրջ կասկածներ:

«Մեզ համար սա շատ կարեւոր է, քանի որ շուկայում շուրջ 7000 մարդ է աշխատում, եւ մենք պետք է շատ զգույշ լինենք ու շատ լավ պատկերացնենք, թե ինչ խնդիրների ու ռիսկերի հետ գործ ունենք»,- նշեց վարչապետը` հանձնարարելով, որպեսզի այնտեղ ստուգումները ունենան մեկ գործընթաց միեւնույն ժամանակահատվածում, չլինեն տարբեր ստուգումներ` տարբեր ժամանակահատվածում:

Վարչապետը նշեց, որ պետք է հասկանալ, թե ինչ է կատարվում այդ շուկայում, ինչ ռիսկեր եւ խնդիրներ կան, եւ ինչու են քաղաքացիները պարբերաբար բողոքում: «Արդյունքների մասին տեղյակ կպահվեն` նշելով բացահայտումներն ու ռիսկերը, որոնք ցավոք, մշտապես դրսեւորվում են` առաջացնելով մեր քաղաքացիների արդարացի դժգոհությունները»,- եզրափակեց վարչապետը: