Քաղաքապետարանը` սիրիահայերին տրամադրած օգնության մասին

Երևանի քաղաքապետարանը, քաղաքապետ Տարոն Մարգարյանի մշտական հսկողությամբ, իրականացնում է սիրիահայ ընտանիքներին սոցիալական աջակցության ծրագիր, որը  ներառում է աջակցություն տարբեր ոլորտներ։ 

Քաղաքապետարանից հայտնում են, որ 2013 թվականի  հունվար-հոկտեմբեր ամիսներին քաղաքապետարանը դրամական աջակցություն է տրամադրել 439  ընտանիքների՝ բնակարանների վարձերի, կոմունալ վարձավճարների, դեղորայքի ձեռքբերման և այլ նպատակներով։ Կենցաղային իրեր, հագուստ, կոշկեղեն, դեղորայք է տրամադրվել  1047  ընտանիքների, պարենային աջակցություն՝ 466  ընտանիքների։

 Սիրիահայերն ընդգրկված են նաև քաղաքապետարանի սոցիալական ընդհանուր ծրագրերում. Երևանի ԶԾՏԿ-ներում հաշվառվել են 259 քաղաքացիներ, «Գթության խոհանոցից» օգտվում են 43 սիրիահայեր։

Սիրիահայ քաղաքացիներից 70-ը կենսաթոշակի իրավունք են ձեռք բերել, 25 սիրիահայ ընտանիքներ էլ նպաստի իրավունք են ստացել։

Ուսումնական տարվան ընդառաջ՝ սիրիահայ ընտանիքների 67 դպրոցահասակ երեխաներ ստացել են դպրոցական պայուսակներ և գրենական պիտույքներ։

Սիրիահայ ընտանիքների սոցիալական աջակցության ծրագրում ներագրավված է նաև առողջապահության վարչությունը։ 2013թ. հունվարից մինչ օրս Երևանի քաղաքապետարանի ենթակա բուժհիմնարկներ են դիմել 1361 սիրիահայեր, որոնցից  139-ը՝ ընթացիկ ամսվա ընթացքում. նրանց տրամադրվել է անվճար բժշկական օգնություն և սպասարկում։