Սիրիան համարում է, որ Լավրովը և Քերին կանխել են պատերազմը

Դամասկոսը ողջունում է Սիրիայի հարցով ՌԴ ԱԳՆ ղեկավար Սերգեյ Լավրովի և ԱՄՆ պետքարտուղար Ջոն Քերիի պայմանավորվածությունները և համարում, որ նրանք կանխել են պատերազմը տարածաշրջանում: Այդ մասին РИА Новости-ին տված հարցազրույցում նշել է Սիրիայի ազգային հաշտության հարցերով նախարար Ալի Հեյդարը:

«Մենք ողջունում ենք այդ պայմանավորվածությունները: Մի կողմից` դրանք կօգնեն սիրիացիներին դուրս գալ այդ ճգնաժամից, մյուս կողմից՝ կանխել պատերազմը Սիրիայում»,- ասել է նա:

Հիշեցնենք, որ  սեպտեմբերի 14-ին Ժնեւում անցկացված բանակցությունների արդյունքում  ՌԴ արտգործնախարար Սերգեյ Լավրովը եւ ԱՄՆ պետքարտուղար Ջոն Քերին հայտարարեցին, որ Ռուսաստանն ու ԱՄՆ-ը համաձայնեցրել են Սիրիայի քիմիական զենքը միջազգային վերահսկողության հանձնելու վերաբերյալ ծրագիրը: