Ռուսաստանում հարձակվել են հայ գործարարի տան վրա. կան զոհեր

Ռուսաստանի Ստավրոպոլի երկրամասի Գեորգեւսկի շրջանի Լիսոգորսկայա գյուղում հուլիսի 28-ի գիշերը անհայտ անձը դիմակավորված ներխուժել է գործարար Խաչատուր Ղազարյանի տուն եւ կրակ բացել: Գործարարի դուստրը՝ 11-ամյա Լիանա Ղազարյանը, ստացած վնասվածքներից տեղում մահացել է, իսկ որդին՝ 16-ամյա Արսեն Ղազարյանը, մահացել է հիվանդանոցում: Երեխաների մայրը` 44-ամյա Թամարա Ղազարյանը, ծանր վիճակում տեղափոխվել է հիվանդանոց: Ընտանիքի հայրը չի տուժել` սպանդի ժամանակ եղել է լոգասենյակում: Կրակոցների ձայնը լսելով՝ ոստիկանություն են զանգահարել հարեւանները:

Հանցագործը հայ գործարարի տուն է մտել ձեղնահարկից: Հյուրասենյակում բազմոցին քնած են եղել երեխաները: Մտածելով, թե բազմոցին գործարար ամուսիններն են, մարդասպանը կրակահերթ է արձակել նրանց ուղղությամբ:

Այժմ որոնողական աշխատանքներ են տարվում հանցագործին հայտնաբերելու համար: Սպանության դրդապատճառներն անհայտ են: Ոստիկանության վարկածները երկուսն են՝ անձնական թշնամություն եւ բիզնես խնդիրներ: 

Լուսանկարը՝ http://lifenews.ru-ի