Մեկնարկային կազմում փոփոխություններ կլինեն. Վարդան Մինասյան

Հունիսի 10-ին Կոպենհագենի «Պարկեն» մարզադաշտի մամուլի ասուլիսների սրահում տեղի է  ունեցել Հայաստանի ազգային հավաքականի գլխավոր մարզիչ Վարդան Մինասյանի մամուլի ասուլիսը, որը նվիրված էր հունիսի 11-ին կայանալիք 2014թ. Աշխարհի գավաթի խաղարկության` Դանիա-Հայաստան ընտրական հանդիպմանը. հայտնում է ՀՖՖ պաշտոնական կայքը:

Պատասխանելով Հայաստանի և Դանիայի ԶԼՄ-ի ներկայացուցիների հարցերին՝ Վարդան Մինասյանը մասնավորապես նշել է, որ Մալթայի հավաքականի հետ հանդիպման արդյունքն արդեն անցյալ է, և պարզապես պետք է վերլուծություններ անել այդ խաղից: Մարզիչն ընդգծել է, որ տղաները պատրաստ են հանդիպմանը` ավելացնելով, որ, Մալթայի հավաքականի հետ հանդիպման համեմատ, մեկնարկային կազմում կլինեն փոփոխություններ:

«Դանիայի հավաքականն ուժեղ մրցակից է, սակայն այս հանդիպման ընթացքում ճնշումը և պատասխանատվությունը ավելի շատ կլինեն տանտերերի վրա, եթե հաշվի առնենք թիմերի տեղերը մրցաշարային աղյուսակում», - եզրափակել է Վարդան Մինասյանը: