Մյանմայի ափերի մոտ լաստանավ է խորտակվել

Մյանմայի ափերի մոտ մոտ 200 փախստական փոխադրող լաստանավ է խորտակվել: Ողբերգությունը տեղի է ունեցել Ռակհայն նահանգի Պաուկտավա քաղաքի մոտակայքում. տեղեկացնում է РБК-ն:

Լաստանավը բախվել է ստորջրյա քարերին եւ շրջվել: Նավում եղել են ռոհինջա մահմեդականներ, որոնց տարհանել են «Մահասեն» արեւադարձային ցիկլոնի մոտենալու պատճառով: Տասնյակ մարդիկ անհայտ կորած են համարվում: Փրկարարները չեն բացառում, որ զոհերի թիվը կարող է գերազանցել 100-ը:

Ռոհինջան Մյանմայի փոքրաթիվ ժողովուրդ է, դավանում է իսլամ: ՄԱԿ-ի տվյալներով` ռոհինջան աշխարհի ամենաշատ հետապնդվող ազգային փոքրամասնությունն է: Շատերը փախչում են Մյանմայից Բանգլադեշ եւ Հնդկաստանի մահմեդական շրջաններ, որտեղ ապաստան են գտնում փախստականների ճամբարներում: