ԵԱՀԿ գործող նախագահի հատուկ ներկայացուցիչը այցելել է տարածաշրջան

ԵԱՀԿ գործող նախագահի` հակամարտությունների հարցով հատուկ ներկայացուցիչ Անդրեյ Դեշչիցան սկսել է իր այցը Հարավային Կովկաս. այսօր նա ժամանել է Բաքու. տեղեկացնում են տեղական ԶԼՄ-ները:

Նախատեսված են նրա հանդիպումները Ադրբեջանի պաշտպանության նախարար Սաֆար Աբիեւի, արտգործնախարար Էլմար Մամեդյարովի եւ երկրի նախագահի աշխատակազմի ներկայացուցիչների հետ: Հանդիպումների ընթացքում քննարկվելու են Ղարաբաղյան հակամարտության կարգավորման գործընթացը, նաեւ ԵԱՀԿ գործող նախագահ, Ուկրաինայի արտգործնախարար Լեոնիդ Կոժարայի` տարածաշրջան այցի կազմակերպման մանրամասները:

Ադրբեջանից Դեշչիցան ապրիլի 15-16-ը կայցելի Վրաստան, ապրիլի 16-17-ը կլինի Հայաստանում: