ԲՀԿ-ականները եկել են, որովհետեւ ընդունում են նախագահական ընտրությունների արդյունքները

Մարզահամերգային համալիրում մեկնարկել է Սերժ Սարգսյանի երդման արարողությունը:

Նշենք, որ խորհրդարանական խմբակցություններից երեքը՝ ՀՅԴ-ն, ՀԱԿ-ը, «Ժառանգությունը» հստակ որոշում էին կայացրել եւ հայտարարել էին, որ չեն մասնակցելու երդման արարողությունը:

ԲՀԿ-ն հատուկ նիստի վերաբերյալ այդպես էլ որոշում չկայացրեց: ԲՀԿ նախագահ Գագիկ Ծառուկյանը երկրից բացակայելու պատճառով չի մասնակցում Սերժ Սարգսյանի երդման արարողությանը: Սակայն Մարզահամերգային համալիրից Yerkir.am-ի թղթակիցը հայտնում է, որ այստեղ են մի շարք ԲՀԿ-ական պատգամավորներ, մասնավորապես` ՄԱԿ նախագահ Գուրգեն Արսենյանը, Գրիգորի Մարգարյան՝  Բելաջիոյի Գրիշը, Արայիկ Աղաբաբյանը, Կարո Կարապետյանը՝ Յուվեցի Կարոն: Վերջինս հրաժարվեց պատասխանել մեր թղթակցի հարցին: Գուրգեն Արսենյանն էլ նախ հայտարարեց, որ ԲՀԿ-ում նիստին մասնակցել-չմասնակցելու վերաբերյալ որոշում չի կայացվել:

Մեր թղթակցի դիտարկմանը, թե կարո՞ղ ենք փաստել, որ, երդման արարողությանը մասնակցելով, ընդունում է նախագահական ընտրությունների արդյունքները, Գուրգեն Արսենյանը, ըստ էության, համաձայնեց, հայտարարելով. «ՀՀ բոլոր այն ատյանները, որոնք որ արձանագրում եւ հաստատում են նախագահական ընտրությունների արդյունքները, այդ բոլոր ատյանները հռչակել են, որ ՀՀ նախագահ է ընտրվել Սերժ Սարգսյանը: Ես վիճարկողների թվում չեմ եղել: Ես ի գիտություն եմ ընդունում ՀՀ պատկան մարմինների հայտարարությունները»:

Մեր թղթակցի նույն հարցին ի պատասխան, Գրիգորի Մարգարյանը եւս հայտարարեց, որ ընդունում է նախագահական ընտրությունների արդյունքները, եւ նշեց, որ, ի վերջո, սա ՀՀ նախագահի երդման արարողություն է, եւ ինքն էլ մասնակցում է: