Գերմանիայի Բունդեսթագի նախագահն այցելեց Ծիծեռնակաբերդ

Գերմանիայի Բունդեսթագի նախագահ Նորբերթ Լամմերթն այսօր այցելեց Ծիծեռնակաբերդ` Մեծ եղեռնի զոհերի հուշարձանին: Հարգանքի տուրք մատուցելով 1915 թվականին Օսմանյան կայսրությունում իրականացված Ցեղասպանության զոհերի հիշատակին` նա, այնուհետեւ դիտեց Ցեղասպանության թանգարան-ինստիտուտում ցուցադրված նյութերը եւ գրառում կատարեց բարձրաստիճան եւ պատվավոր հյուրերի հուշամատյանում:

«Ցեղասպանության զոհերի հիշատակի համար մեր զորակցությունն ու աջակցությունն ենք հայտնում հայ ժողովրդին»,- գրել է Նորբերթ Լամմերթը:

Մինչ ցուցանմուշները դիտելը Լամմերթը լրագրողներին ասել էր, որ Ցեղասպանության թանգարան եւ հուշարձան այցելելը իր` Հայաստան կատարած պաշտոնական այցի ամենահուզիչ մասն էր: Նորբերթ Լամմերթը նշել է, որ ինքը դատապարտում է 1915 թվականին Օսմանյան կայսրությունում տեղի ունեցած դեպքերը եւ իր աջակցությունն էր հայտնել հայ ժողովրդին: Բունդեսթագի նախագահը Ցեղասպանության ճանաչման եւ դատապարտման հարցում հիշեցրել է, որ դեռեւս 2005 թվականին է Գերմանիայի Բունդեսթագը ընդունել Ցեղասպանությունը դատապարտող բանաձեւ: