Քաշաթաղում քվեարկության արդյունքները կեղծելու փաստի առթիվ քրգործ է հարուցվել

Քաշաթաղի շրջանի Արտաշավի համայնքում 2012թ. հոկտեմբերի 14-ին կայացած համայնքի ղեկավարի ընտրությունների ընթացքում քվեարկության արդյունքները կեղծելու փաստի առթիվ, ԼՂՀ Քրեական օրենսգրքի 150-րդ հոդվածով նախատեսված հանցագործության հատկանիշներով, գլխավոր դատախազության հատուկ քննչական բաժնում հարուցվել է քրեական գործ: Տարվում է նախաքննություն. այս մասին հայտնում է ԼՂՀ գլխավոր դատախազության կայքը:

Քրեական գործով դատավարական ղեկավարումն ու դատախազական հսկողությունն իրականացնում է ԼՂՀ գլխավոր դատախազության ավագ դատախազը:

Ըստ կենտրոնական ընտրական հանձնաժողովի կայքում տեղադրված արդյունքների՝ նշված համայնքում առաջադրվել էր երկու թեկնածու՝ Արմեն Դոխոլյանը եւ Թելման Ավետյանը։ Վերջինս, ԿԸՀ արդյունքներով, համայնքի ղեկավար է ընտրվել 6 ձայնի տարբերությամբ։

Թե ում օգտին են արդյունքները կեղծվել, դատախազությունը չի նշում։