Ո՞վ էր Հայրիկյանին հրավիրել ''Գարեգին Նժդեհ'' ֆիլմի պրեմիերային

Կիրակի օրը  «Մոսկվա» կինոթատրոնում  ՀՀԿ վերնախավը, ՀՀ նախագահ Սերժ Սարգսյանի գլխավորությամբ, ներկա էր «Գարեգին Նժդեհ» ֆիլմի՝ հատուկ ՀՀԿ-ի համար նախատեսված պրեմիերային: Եկել էր նաեւ նախագահի թեկնածու, ԱԻՄ կուսակցության նախագահ Պարույր Հայրիկյանը:

Այսօր լրագրողների հետ հանդիպման ժամանակ Yerkir.am-ը Հայրիկյանից հետաքրքրվեց, թե ո՞վ էր հրավիրել նրան այդ պրեմիերային, եւ ինչպես էր ստացվել, որ նախագահի թեկնածուներից միայն ինքն էր հրավիրված: Պարզվում է` հրավիրողը եղել է «ֆիլմի պատասխանատուներից»: Հայրիկյանն ընդգծեց, որ նախագահի մյուս թեկնածուներին էլ է հրավեր ուղարկվել, իսկ ինքը, կարողանալով ճիշտ տեղավորվել ժամանակում, կարողացել է ներկա գտնվել պրեմիերային:

«Եթե ինձ նախապես հարցներ սցենարիստը, ես որոշ ուղղումներ կանեի, օրինակ` ֆիլմում Նժդեհն օգտագործում է «ցեղասպանություն» բառը, բայց նրա օրոք այդ բառը չկար: Բայց, դե, հիմա մարդիկ շտապել են: Շատ հուզիչ ֆիլմ էր: Նժդեհը ողբերգական կերպար է: Այս ֆիլմում կար այդ ողբերգական կերպարը, եւ ես շատ տառապագին պահեր ապրեցի»,- հայտարարեց Հայրիկյանը: