Ծառուկյանը Խոսրովի արգելոցում ո՞րս է արել. ''Ժամանակ''

«Ժամանակի» տեղեկություններով, ամանորյա տոներից առաջ ԲՀԿ նախագահ Գագիկ Ծառուկյանը  ուղղաթիռով որսի է գնացել Խոսրովի արգելոց։

Թերթի հետ հեռախոսազրույցում Գ. Ծառուկյանի մամլո խոսնակ Իվետա Տոնոյանը, սակայն, հերքել է լուրը։ Բայց թերթի աղբյուրների փոխանցմամբ, Ծառուկյանը Նոր տարին Ֆրանսիայի Նիցցա քաղաքում անցկացնելուց առաջ որոշել է նախ ուղղաթիռով որսի գնալ։
Նման դեպքերում ՀՀ-ում ուղղաթիռ կարող են տրամադրել պաշտպանության նախարարությունը եւ ՀՀ Քաղաքացիական ավիացիան։

Փորձել են ճշտել, թե Գ. Ծառուկյանն այս գերատեսչություններից որ մեկի՞ց է ստացել ուղղաթիռը։ Քաղավիացիայից պատասխանել են, որ իրենք չունեն, իսկ ՊՆ-ից էլ պատասխանել են, որ նման դեպք չի եղել։

Սակայն չի բացառվում, որ ուղղաթիռը այս երկու գերատեսչություններից մեկից վերցվել է ոչ լեգալ կերպով։ Չէ՞ որ Խոսրովի արգելոցում որսն արգելված է։ Իսկ թե ում հետ է որսի գնացել ԲՀԿ ղեկավարը կամ ինչ է որսացել՝ թերթին չի հաջողվել պարզել: