Հայաստանի զինված ուժերն ի վիճակի են ապահովել Հայաստանի եւ ԼՂՀ-ի անվտանգությունը

Եթե Ստեփանակերտի օդանավակայանի շահագործման մասին վերջնական որոշում լինի, ապա Հայաստանի ՀՕՊ ուժերը կապահովեն ՀՀ քաղաքացիական ինքնաթիռների անվտանգ թռիչքները դեպի այնտեղ եւ այնտեղից. լրագրողներին այսօր ասաց ՀՀ պաշտպանության նախարար Սեյրան Օհանյանը:

Նա նշեց, որ ՀՀ զինված ուժերն այսօր ԼՂՀ ժողովրդի անվտանգության երաշխավորն են: Ըստ Սեյրան Օհանյանի` Հայաստանի ռազմական դոկտրինը, համագործակցելով ԼՂՀ ՊԲ-ի հետ, ուղղված է Հայաստանի եւ Լեռնային Ղարաբաղի անվտանգության ապահովմանը, եւ պատերազմական գործողությունների վերսկսման դեպքում զինված ուժերը կարող են լիարժեք լուծել իրենց առջեւ դրված մարտական խնդիրներն ու իրագործել առաջադրանքները:

Կարճ ամփոփելով 2012 տարին ԶՈւ-ի համար` նախարարը բնութագրեց այն «մարտական կարգապահության առումով՝ լիարժեք, 2011 թվականի արդյունքների պահպանման եւ հետագա զարգացման հիմքերի ստեղծման տարի»: