ՄԻՊ-ն անակնկալ այց է կատարելու Ավանի կրթահամալիր

Yerkir.am-ն արդեն տեղեկացրել է, որ Ավան թաղամասի բնակիչները նամակով դիմել էին Ամենայն Հայոց կաթողիկոսին, ՀՀ ոստիկանության պետ, գեներալ-լեյտենանտ Վ. Գասպարյանին, ՀՀ ԿԳ նախարար Արմեն Աշոտյանին` տեղեկացնելով, որ Ավան թաղամասի Թամրուչի 36 հասցեում գտնվող գիշերօթիկ հանրակրթական դպրոցում երեխաներին ծեծում են, դեղեր խմեցնում և սովամահ անում:

ՀՀ ԿԳ նախարարությունը հարցի հետ կապված տվել է իր պարզաբանումը: Մարդու իրավունքների պաշտպանության գրասենյակի աշխատակիցները նույնպես այցելել են կրթահամալիր եւ արձանագրել. «Մխիթարյան կրթահամալիր այցի ընթացքում Պաշտպանի աշխատակազմի իրավապաշտպանները հանդիպեցին կրթական մասով տեղակալի հետ: Վերջինս նրանց ծանոթացրեց հաստատության պայմաններին՝ ցույց տալով ննջասենյակները, ճաշարանը, դասասենյակները: Կրթահամալիրի աշխատակազմն ու աշակերտները գտնվում էին արձակուրդում, ինչի պատճառով իրավապաշտպանները համակողմանի ուսումնասիրության հնարավորություն չունեցան: Այնուամենայնիվ, Պաշտպանի աշխատակազմի ներկայացուցիչներին հաջողվեց առանձնազրույց ունենալ երեք աշակերտների հետ, որոնք, չնայած արձակուրդին, գտնվում էին դպրոցում:

Խոսելու ընթացքում երեխաները նշեցին, որ դպրոցի պայմաններից ու մանկավարժների վերաբերմունքից բողոքներ չունեն: Պաշտպանի աշխատակազմը պատրաստվում է գրություններ ուղարկել համապատասխան իրավասու մարմիններին, ինչպես նաև բազմակողմանի ուսումնասիրություն կատարելու նպատակով, դասերը վերսկսելուց հետո Պաշտպանի աշխատակազմն անակնկալ այց է կատարելու կրթահամալիր»: