Բոլոր հնարավոր միջոցներով մեծացվելու է ԼՂՀ անվտանգությունը. Սերժ Սարգսյան

Արդեն տեղեկացրել ենք, որ այսօր Երևանի Մարզահամերգային համալիրում մեկնարկել է ՀՀԿ 14-րդ համագումարը:

Հմաագումարի ժամանակ ելույթ  է ունեցել ՀՀ նախագահ, ՀՀԿ նախագահ Սերժ Սարգսյանը: Իր ելույթում նա, անդրադառնալով Ղարաբաղյան խնդրին, ասել է.

«Լեռնային Ղարաբաղի խնդիրը պետք է լուծում ստանա բացառապես խաղաղ և բանակցային ճանապարհով: Հաշվի առնելով Ադրբեջանի ապակառուցողական քաղաքականությունը, հայատյացություւնը, ուժի և ուժի սպառնալիքի ամենօրյա կիրառումը` բոլոր հնարավոր միջոցներով ավելի են մեծացվելու Լեռնային Ղարաբաղի և նրա բնակչության անվտանգության երաշխիքները»,- ասել է Սերժ Սարգսյանը:

 Երախտագիտություն հայտնելով ԵԱՀԿ Մինսկի խմբի համանախագահող երկրներին հակամարության խաղաղ կարգավորման գործընթացում ներդրած ջանքերի համար` ՀՀ Նախագահը նշեց, որ միջնորդների և միջազգային հանրության ուշադրությունը հրավիրվելու է խաղաղ կարգավորումը հնարավոր դարձնող վստահության միջոցների ստեղծման և ամրապնդման հարցերին:

«Ադրբեջանի քաղաքականությունն ընդհանրապես, մասնավորապես` դիպուկահարներին հետ քաշելուց և շփման գծում միջադեպերի հետաքննության մեխանիզմի գործարկումից հրաժարվելը, մարդասպաններին հերոսացնելը, այլատյացությունը և ռասիզմը խրախուսելը, անհուսալի և երկերեսանի կեցվածքը բանակցություններում` որևէ կերպ չեն նպաստում վստահության միջոցների ստեղծմանը և համապատասխան արձագանք չստանալու դեպքում ծայրաստիճան սրում են իրավիճակն ամբողջ տարածաշրջանում»,- ասաց Սերժ Սարգսյանը:

 Երկրի ղեկավարի խոսքով` արդյունավետ բանակցությունների վարումը կառուցողական մթնոլորտում հնարավոր կլինի այն դեպքում, երբ հակամարտության կողմերն իրապես ապահովեն ուժի և դրա սպառնալիքի չկիրառումը՝ դրա խախտումը բացառող համապատասխան միջազգային երաշխիքներով: