7 միլիարդերորդը արթիկցի է

Այսօր Արթիկի Մոր և մանկան առողջության պահպանման կենտրոնում նշվել է 7 միլիարդերորդ մանկիկի ծնունդը: Տոնակատարությունը նախաձեռնել էին ՄԱԿ-ի Բնակչության հիմնադրամի հայաստանյան գրասենյակը և Վերարտադրողական առողջության, պերինատոլոգիայի, մանկաբարձության և գինեկոլոգիայի ինստիտուտը:

Միջոցառմանը մասնակցել են նաև Արթիկի քաղաքապետարանի, Շիրակի մարզպետարանի առողջապահության վարչության, Հայ Առաքելական եկեղեցու ներակայացուցիչներ, լրագրողներ և արթիկցիներ:

Եվ այսպես` խորհրդանշական 7 միլիարդերորդ մանկիկը Վահրամ Ոսկանյանն է՝ ծնված 2011 թ. հոկտեմբերի 31-ին` ժամը 00:20-ին, 2 կգ 900 գրամ քաշով և 50 սմ հասակով: Երեխայի մայրը տնային տնտեսուհի է, իսկ հայրը զբաղվում է արտագնա աշխատանքով:

7 միլիարդերորդ մանկիկին և նրա մայրիկին, ինչպես նաև այդ օրը ծննդատանը գտնվող բոլոր ծննդկաններին հանձնվել են նվերներ:

Համաձայն ՄԱԿ-ի հաշվարկների՝ աշխարհի բնակչությունը 7 միլիարդի սահմանն անցնում է 2011 թ. հոկտեմբերի 31-ին: Քանի որ ճշգրտորեն հաշվարկել, թե որտեղ է ծնվելու և ով է լինելու 7 միլիարդերորդ երեխան, գործնականում հնարավոր չէ, 2011 թ. հոկտեմբերի 31-ին աշխարհի երկրներում՝ այդ թվում Հայաստանում, տոնում են «7 միլիարդի օրը»՝ ընտրելով իրենց 7 միլիարդերորդ մանկիկին: