Քոչարյանին աջակցելը` դավաճանությո՞ւն

Քոչարյանի` մեծ քաղաքականություն վերադառնալը նրա սահմանադրական իրավունքն է ու անձնական որոշումը. այսօր լրագրողների հետ հանդիպման ժամանակ ասաց ԱԺ ՀՀԿ-ական պատգամավոր Համլետ Հարությունյանը:

«Եթե առաջին նախագահը վերադարձել է մեծ քաղաքականություն, ապա երկրորդն էլ բարոյական իրավունքն ունի: Եվ ինձ թվում է, որ Ռոբերտ Քոչարյանն ավելի մեծ շանսեր ունի նախագահ դառնալու, քան Լեւոն Տեր-Պետրոսյանը, եթե հաշվի ենք առնում նրա կառավարման տարիների հաջողությունները»,- հայտարարեց նա:

Հարցին, թե ՀՀԿ-ն կաջակցի՞ Ռ. Քոչարյանին նախագահական ընտրությունների ժամանակ, Հ. Հարությունյանը պատասխանեց, որ, ՀՀԿ-ի թեկնածուից բացի, այլ անձի ձայն տալն աններելի է. «Ո՞նց եք ՀՀԿ խորհրդի անդամին նման հարց տալիս: Դուք վիրավորում եք մարդուն, երբ կասկածում եք, որ ՀՀԿ խորհրդի անդամը կարող է դավաճանել իր առաջնորդին»:

Ի պատասխան այն նկատառմանը, թե Քոչարյանը հայտարարել էր, որ ինքն է շատ ՀՀԿ-ականների «մարդ դարձրել» իր կառավարության օրոք, պատգամավորը հետեւյալն ասաց. «Ի վերջո, Ռոբերտ Քոչարյանը տասը տարի եղել է էս երկրի նախագահը: Մի քիչ կոպիտ է ասված «մարդ դարձնելը», բայց նրա օրոք շատ-շատերը մեծ հաջողություններ են ունեցել, եւ ստորություն կլինի դրանք ժխտելը»: