ՀՀ նախագահը հյուրընկալել է Շառլ Անզնավուրին

Հայաստանի նախագահի մամուլի գրասենյակից yerkir.am-ին հայտնում են, որ ՀՀ նախագահ Սերժ Սարգսյանն իր նստավայրում այսօր հյուրընկալել է Հայաստանի ազգային հերոս, աշխարհահռչակ շանսոնյե Շառլ Ազնավուրին:

Հանդիպմանը ներկա են եղել Ազնավուրի իմպրեսարիո Լևոն Սայանը, ֆրանսիացի արվեստի գործիչներ Ժերոմ Ռևոնը եւ Ստեֆան Գատոն:

Զրուցակիցներն անդրադարձել են Հայաստանի եւ Ֆրանսիայի նախագահների բարձր մակարդակի վերջին փոխայցելություններին, որոնք, նրանց համոզմամբ, հայ-ֆրանսիական դարավոր բարեկամության եւս մեկ վկայություն են եւ նոր խթան կդառնան երկու երկրների հարաբերությունների առավել ամրապնդման ու զարգացման գործում:

Հանդիպման ընթացքում Նախագահը Լեւոն Սայանին է հանձնել նրան շնորհված ՀՀ պետական պարգևը` Պատվո շքանշանը, որ պարոն Սայանն ստացել էր դեռևս 2009 թվականին` հայ ֆրանսիական բարեկամական կապերի ամրապնդման ու զարգացման գործում ներդրած նշանակալի ավանդի, ինչպես նաև երկարամյա ազգանպաստ գործունեության համար:

Իսկ Ժերոմ Ռեւոնին եւ Ստեֆան Գատոյին Հանրապետության ղեկավարը հանձնել է Մովսես Խորենացու մեդալ, որով արվեստի այս գործիչները պարգևատրվել էին ՀՀ անկախության 20-րդ տարեդարձի առթիվ և հայ ֆրանսիական մշակութային կապերի ամրապնդման ու զարգացման գործում ներդրած նշանակալի ավանդի համար: Նախագահը շնորհավորել է պարգևատրման կապակցությամբ եւ հանդիպման պատեհ առիթով մեկ անգամ եւս շնորհակալություն հայտնել այն գործունեության համար, որը բարձր է գնահատվել Հայաստանում` ՀՀ պետական պարգևների արժանանալու հիմք դառնալով: