Արաս Օզբիլիզը պաշտոնապես դարձավ ՀՀ քաղաքացի և ազգային հավաքականի խաղացող (տեսանյութ և լուսանկարներ)

ՀՀ նախագահի հրամանով` հայազգի ֆուտբոլիստ Արաս Օզբիլիզին շնորհվել է Հայաստանի Հանրապետության քաղաքացիություն:

Այսօր ՀՖՖ նախագահ Ռուբեն Հայրապետյանը, լրագրողներին ֆուտբոլիստին ներկայացնելով, ՀՀ օրհներգի հնչյունների ներքո նրան հանձնեց ՀՀ անձնագիրը, որը հնարավորություն կտա Արազին խաղալ ազգային հավաքականում, նաև` 23 համարի մարզաշապիկը:

«Ես նայել եմ Անդորրայի և Սլովակիայի հանդիպումները: Սլովակիան վատ թիմ չէ,  հիշենք Իտալիայի դեմ տարած հաղթանակը, և ես հպարտ եմ դառնալ այս թիմի անդամ: Ինձ համար դժվար էր ընտրություն կատարելը, որովհետև իմ մարզիչը խորհուրդ էր տալիս Հոլանդիան ընտրել. այսօր, սպորտային տեսանկյունից,  այն 2-րդն է: Բայց իմ սիրտը զարկում է Հայաստանի համար: Դիրքային տեսակետից կապ չունի` կարող եմ և' աջից, և' ձախից խաղալ»,- ասաց Արասը:

Լրագրողի այն հարցին, թե պատրաստվո՞ւմ են նոր ֆուտբոլիստներ հրավիրել, Ռ. Հայրապետյանը պատասխանեց. «Ի՞նչ եք կարծում, մեր հավաքականը թո՞ւյլ է: Ուժեղանալու համար մեր ընտրանին պետք է տարիներ աշխատի: Բնականաբար, երբ որևէ տաղանդավոր ֆուտբոլիստ ենք գտնում, հրավիրում ենք: Թումասյանը հայ չէ, մենք հայերին ենք հրավիրում»:

Օզբիլիզն այժմ ֆունկցիոնալ լավ վիճակում չի գտնվում և առաջիկա խաղերում չի կարողանա հանդես գալ, սակայն նա նշեց, որ երեք շաբաթից ի վիճակի կլինի օգնել թիմին:

Արասը ֆուտբոլ է խաղում 4-5 տարեկանից, 7 տարեկանում մասնակցել է տաղանդների մրցույթին և ներգրավվել 18 ընտրյալների մեջ: Դրանից հետո 8 տարեկանից խաղում է «Այաքս»-ում: Հայերեն շատ քիչ է խոսում, բայց սովորում է:

«Երբ փոքր էի, կիրակի օրերին գնում էի եկեղեցի և այնտեղ հայերենի դասընթացներ էի անցնում, սակայն դա Ամստերդամում էր, իսկ ես հեռու էի ապրում: Եվ սովորելու հնարավորություն չունեցա»,- խոսքը եզրափակեց Հայաստանի հավաքականի նորընծա ֆուտբոլիստը:

Լուսանկարներն այստեղ