Հանդիպում ԵԱՀԿ Մինսկի խմբի համանախագահների հետ

ՀՀ նախագահի գլխավորած պատվիրակության կազմում Նյու Յորքում գտնվող ԱԳ նախարար Էդվարդ Նալբանդյանը սեպտեմբերի 22-ին հանդիպում է ունեցել ԵԱՀԿ Մինսկի խմբի համանախագահներ Իգոր Պոպովի, Ռոբերտ Բրադկեի եւ ԵԱՀԿ գործող նախագահի անձնական ներկայացուցիչ Անջեյ Կասպրշիկի հետ:

Ինչպես տեղեկացնում է ՀՀ ԱԳՆ մամուլի եւ տեղեկատվության վարչությունը, հանդիպման ընթացքում քննարկվել է Արցախյան հիմնախնդրի խաղաղ կարգավորման բանակցային գործընթացը: Զրույցի ընթացքում արտգործնախարար Էդվարդ Նալբանդյանը դարձյալ ընդգծել է, որ բանակցություններում հնարավոր է առաջընթաց արձանագրել այն պարագայում, եթե Ադրբեջանը հետ վերցնի այն 10 փոփոխությունները, որոնք առաջ էր քաշել Կազանում:

Անդրադարձ է կատարվել նաեւ 2010թ. հոկտեմբերի 27-ին Աստրախանի գագաթաժողովում ձեռք բերված` շփման գծում միջադեպերի հետաքննության մեխանիզմի ստեղծման վերաբերյալ պայմանավորվածության իրագործմանը: