"Պապիկ-տատիկ"-ի հարցը` Ազգային ժողովում

ԼՂՀ Ազգային ժողովի երեկվա նիստում կառավարության հետ հարցուպատասխանի ժամանակ պատգամավորներից մեկը, հղում կատարելով սոցիալական ցանցերին, բարձրացրել է Ստեփանակերտի մատույցներում գտնվող` Արցախի խորհրդանիշը համարվող «Մենք ենք մեր լեռները» («Պապիկ-տատիկ») հուշարձանի անմխիթար վիճակում գտնվելու հարցը։

Հարցին պատասխանել է վարչապետ Արա Հարությունյանը, քանի որ Ստեփանակերտի քաղաքապետը ներկա չի եղել նիստին։ Համաձայնելով, որ Արցախի խորհրդանիշը աններելի, ոչ հարիր վիճակում է` վարչապետը նշել է, որ հուշարձանի բարեկարգման համար Ստեփանակերտի քաղաքապետարանի կողմից մրցույթ է հայտարարվել, սակայն խնդիրներ կան` կապված հեղինակային իրավունքի հետ: «Հեղինակի զավակները պարտադիր պահանջներ են ներկայացնում»,- ասել  է Ա. Հարությունյանը, սակայն նա համոզված է, որ 2012 թվականին հարցը կլուծվի:

Վարչապետը հավելել է, որ նորընտիր քաղաքապետին կհանձնարարեն արագացնել հուշարձանը պատշաճ վիճակի բերելու գործը:

Հիշեցնենք, որ օրեր առաջ «Ֆեյսբուք»-ում արցախցի երիտասարդների նախաձեռնությամբ մի խումբ է բացվել, որը քննարկման է դրել հուշարձանի խայտառակ վիճակի թեման։ Խմբի անդամները նպատակ ունեն ոլորտի պատասխանատուների ուշադրությունը հրավիրել այդ հարցի վրա։ Նրանք նախատեսում են նաեւ այդ հարցը բարձրացնել Ստեփանակերտի` սեպտեմբերի 18-ին ընտրվելիք քաղաքապետի առջեւ։