Մարզվում եմ ինձ համար, օրինակ ծառայում` մյուսներին

Օrange fitness  ակումբում ընթացող բադմինթոնի մրցաշարում հաջող են հանդես գալիս Բուլղարիայի ներկայացուցիչները:

Նրանց թվում է նաև Բուլղարիայի բադմինթոնի ֆեդերացիայի նախագահ, Բյուզանդ Կասաբյանը (2002-ից ՖԿՀՊԻ-ի պատվավոր պրոֆեսոր):

- Վաղո՞ւց եք ապրում Բուլղարիայում:

- Ես ծնվել և մեծացել եմ այնտեղ` հայկական ընտանիքում: Մասնագիտությամբ սպորտային բժիշկ եմ, իսկ բադմինթոն խաղալ սովորել եմ ավելի ուշ` Վրաստանում, այնուհետև  սկսել եմ խաղը զարգացնել Բուլղարիայում:

- Որքա՞ն ժամանակ է` ղեկավարում եք Բուլղարիայի բադմինթոնի ֆեդերացիան:

- Արդեն 20 տարի:

- Ձեր հավաքականում կա՞ն  հայազգի մարզիկներ:

- Իհարկե, ճիշտ է, նրանց թիվն  այնքան էլ մեծ չէ, սակայն  միջազգային մրցումներում նրանք բավական հաջող են հանդես գալիս:

- Առաջին անգա՞մ եք մասնակցում Համահայկական խաղերին:

- Ո'չ, սկսած 2003-ից: Մեր երկրի տարբեր քաղաքներից եղել են մասնակիցներ:

- Խաղերին ներկայացել եք մարտական կազմով: Ի՞նչ ակնկալիքներ ունեք Ձեր թիմից:

- Իսկապես ուժեղ կազմ է, բոլորս էլ լավ պատրաստված ենք, եզրափակչի  թե' մենախաղերում և թե' զուգախաղերում ոսկե մեդալին հավակնելու մեծ հնարավորություններ ունենք:

- Համագործակցո՞ւմ եք Հայաստանի բադմինթոնի ֆեդերացիայի հետ:

- 2003 թվականին արժանացել եմ Հայաստանի բադմինթոնի ֆեդերացիայի պատվավոր նախագահի կոչմանը: Հենց այդտեղից էլ սկսվեց մեր համագործակցությունը: Հնարավոր միջոցներով օժանդակում ենք Հայաստանում մարզաձևի զարգացմանը:

- Չնայած Ձեր տարիքին` բավական լավ մարզավիճակում եք:

- Մարզվում եմ ինձ համար, օրինակ ծառայում` մյուսներին:

Թագուհի Մելքոնյան