Ոչ կառուցողական եւ վտանգավոր անելանելի վիճակ

Բարաք Օբամայի վարչակազմը հանդես է գալիս այն բանի օգտին, որ ԵԱՀԿ-ն անմիջական դեր ունենա հետխորհրդային տարածքում առկա «սառեցված» հակամարտությունների կարգավորման գործում. հայտարարել է ԱՄՆ պետքարտուղարի Եվրոպայի եւ Եվրասիայի գործերով օգնական Ֆիլիպ Գորդոնը:

Ելույթ ունենալով Կոնգրեսում Հիլսինկյան հանձնաժողովի կազմակերպած լսումների ժամանակ` նա նշել է, որ այդ հակամարտությունները «քայքայիչ պոտենցիալ ունեն, ապակայունացնում են անվտանգությունը տարածաշրջանում», եւ դրանց կարգավորումը պետք է լինի ԵԱՀԿ-ի ու դրան անդամակցող բոլոր երկրների առաջնահերթությունը:

Լսումներին ներկա` Պենտագոնի ղեկավարի միջազգային անվտանգության հարցերով տեղակալ Ալեքսանդր Վերշբոուն, իր հերթին մեկնաբանելով Ղարաբաղյան հակամարտության հարցով բանակցությունները, նշել է, որ այդ խաղաղարար ջանքերում հետընթաց է գրացվել. Կազանում բեկում ունենալու փորձերն ապարդյուն անցան, իսկ լարվածությունը շփման գծում գնալով աճում է:

Նրա ներկայացրած տեղեկատվությամբ` Հայաստանը եւ Ադրբեջանը նախկինի պես չեն կարողանում ավարտել կարգավորման հիմնարար սկզբունքների համաձայնեցումը, եւ «մենք մնում ենք ոչ կառուցողական եւ վտանգավոր անելանելի վիճակում»: