Վարարած գետերը

Վերջին օրերին տեղացած անձրեւների պատճառով վարարել են դեպի Սեւան հոսող Վարդենիկ եւ Մարտունի գետերը, ինչը հեղեղավտանգ իրավիճակ է առաջացրել մի շարք բնակավայրերի համար:

Ինչպես տեղեկացնում են Վարդենիկի գյուղապետարանից, արդեն մեկ շաբաթ է, ինչ Վարդենիկ գետի բարձրացած ջրերը քանդել են գետի հունը, գետից սնվող ոռոգման ջրատարների բետոնե կիսախողովակները, հեղեղել ճանապարհներ ու տնամերձերը:

Գեղհովիտից ստացված տեղեկատվության համաձայն` Մարտունի գետի վարարած ջրերը եւս որոշակի վնասներ են հասցրել համայնքի տնտեսություններին ու բնակիչներին: Հեղեղն այստեղ քանդել է մեկ կամուրջ, ափապաշտպան կառույցներ, երկու թաղամասերի ճանապարհահատվածներ եւ էլեկտրահաղորդման հենասյուներ:

Գեղարքունիքի մարզպետարանից մեզ հայտնեցին, որ համապատասխան տեխնիկական միջոցներով մաքրվել եւ խորացվել են գետերի հուները, ստեղծվել են քարե պատնեշներ, ինչի շնորհիվ նվազեցվել են հեղեղներից սպասվող վտանգը:

Վարդենիկ եւ Մարտունի գետերի մակարդակը վերջին երեք օրերի ընթացքում թեեւ փոքր-ինչ իջել է, սակայն նոր վարարումների վտանգը պահպանվում է, քանի որ այդ գետերի ակունքներում եւ մերձակա սարերում դեռ առկա են ձնածածկույթներ: