Այդ սերը բռնաբարություն է

Նարեկ Սարգսյանը նման է անտաղանդ ու անշնորհք պլաստիկ վիրաբույժի, ով պատրաստ է հանուն սեփական շահի այլանդակել անգամ ամենագեղեցիկ դեմքը: Հայաստանի մայրաքաղաքի դեմքը Ն. Սարգսյանի «լանցետի» տակ արդեն ընկել է. գրված է Երեւանի քաղաքապետ Կարեն Կարապետյանի` Facebook-ի էջում:

Մայրաքաղաքի նոր գլխավոր ճարտարապետի նշանակման դեմ է դուրս եկել հասարակության զգալի մասը: Նրանցից շատերը հիշեցնում են Հայաստանի եւ Երեւանի գլխավոր ճարտարապետի պաշտոնում Նարեկ Սարգսյանի իրականացրած «վիրահատությունների» մասին:

Թվարկումները բազմաթիվ են. օպերայի շենքի մոտ սրճարաններ կառուցվեցին եւ կանաչ տարածքներ ոչնչացվեցին, Հրազդանի կիրճը ռեստորանային համալիրների եւ հասարակաց տների վերածվեց, ժամանակակից արվեստի թանգարանի անվան տակ խանութներ կառուցվեցին, Կասկադի տարածքում բնակելի առանձնատների շինարարություն թույլատրվեց, Հյուսիսային պողոտայում բարձրահարկեր կառուցվեցին, այնինչ, Թամանյանի նախագծի համաձայն, դրանք պետք է օպերայի շենքից բարձր չլինեն, Օղակաձեւ զբոսայգում կանաչ տարածքների հաշվին շենքեր եւ սրճարաններ հայտնվեցին եւ այլն:

Այս բողոք-մենկաբանություններին Կարեն Կարապետյանը պատասխանել է առանձին գրառումով, որտեղ հիմնավորում է այդ նշանակումը, այնուհետեւ առաջարկում է նման քննարկումները հետաձգել մի քանի ամսով, եւ դրանք վերսկսել արդեն կատարված աշխատանքների հիման վրա:

Քաղաքապետի այս նոթն ավելի բուռն քննարկումների եւ անհամաձայնությունների առիթ է տվել: Մասնավորապես` մեծաթիվ մեկնաբանություններ են գրվել քաղաքապետի այս արտահայտության վերաբերյալ. «Նարեկ Սարգսյանը սիրում է Երեւանը ոչ պակաս, քան մեզանից յուրաքանչյուրը, եւ կարծում եմ` բոլորս պետք է իրեն քաջալերենք եւ բարենպաստ դաշտ ստեղծենք, որպեսզի նա հնարավորություն ունենա իր սերը քաղաքի նկատմամբ դրսեւորել»:

Հայտնի բլոգեր Փիղը գրել է. «Պարո'ն քաղաքապետ, սերը գեղեցիկ է, երբ այն երկկողմանի է, հակառակ դեպքում` դա նման է բռնաբարության»: