Վարչապետը մասնակցել է Անիին նվիրված ցուցահանդեսի բացմանը

Հայաստանի Հանրապետության գիտությունների ազգային ակադեմիայի «Ակադեմիա» պատկերասրահում այսօր բացվել է ցուցահանդես` նվիրված Անիի հիմնադրման 1050-ամյա հոբելյանին:

Ցուցահանդեսի բացմանը ներկա են եղել Հայաստանի վարչապետ Տիգրան Սարգսյանը, մշակութային, հասարակական գործիչներ:

Աշխարհի հայ նկարիչների միության համանախագահ Ղազար Միրզոյանը նշել է, որ ցուցահանդեսում ներկայացված են 26 նկարչի` Անիի թեմատիկայով նկարված 72 աշխատանքներ:

«Աշխատանքները նկարելիս մենք վերցրել ենք Փարաջանովի տուն-թանգարանի տնօրեն Զավեն Սարգսյանի` այդ թեմատիկայով արած լուսանկարները: Դրանց հիման վրա նկարիչները սկսել են նկարել, իսկ հետո էլ մեկ օր եղել են Անիում, որտեղ նկարել են էտյուդներ»,- ասել է Ղ. Միրզոյանը: Նրա տեղեկացմամբ` Անիում նկարելիս բոլոր նկարիչների աչքերն արցունքոտվել են: