Ճառագայթման մակարդակը նվազում է

Ճապոնիայի իշխանությունները մեծ ջանքեր են գործադրում երկրաշարժից վնասված ատոմակայանների ռեակտորները վերականգնելու համար, բայց դեռ շատ շուտ է ասել, որ ատոմային ճգնաժամը հասել է շրջադարձային կետին. տեղեկացնում է Reuters-ը:

Այսօր Տոկիոյի էլեկտրական ընկերությունը հայտարարել է, որ «Ֆուկուսիմա-1»-ի բոլոր ռեակտորները միացվել են էլեկտրացանցին: Դրանք նորից վերագործարկելուց առաջ փորձարկվում են սառեցման համակարգերը եւ  այլ անհրաժեշտ սարքավորումներ:

Ճապոնիայի վարչապետ Նաոտո Կանը հայտարարել է, որ իրադրությունը ատոմակայանի տարածքում հետզհետե նորմալանում է, իսկ ԱՄՆ  միջուկային հանձնաժողովի խոսնակ Գրեգորի Ջազկոյի խոքերով` ճառագայթման մակարդակը նվազում է: 

Ճապոնիայի միջուկային անվտանգության գործակալության տվյալներով, սակայն, ճնշումը մեծանում է ամենավտանգավոր` երրորդ ռեակտորում, որը պարունակում է պլուտոնիում:

Իսկ Ճապոնիայի առողջապահության նախարարությունը մտահոգված է սննդամթերքում եւ ջրում առկա ռադիոակտիվ նյութերի մեծ քանակությունից:

Վերջին տվյալների համաձայն` մարտի 11-ի երկրաշարժից եւ ցունամիից զոհվել է 8649 մարդ, անհայտ կորել են 13261-ը, վիրավոր են 2644-ը: