Airbus-ը եւ Air France-ը` դատարանի առաջ

Փարիզյան դատարանը չկանխամտածված սպանության նախնական մեղադրանք է ներկայացրել Airbus կորպորացիային 2009 թվականին հունիսին A330 ինքնաթիռի վթարի կապակցությամբ, որի հետեւանքով 228 մարդ էր զոհվել: Այսօր դատարան են ներկայանալու նաեւ Air France ավիաընկերության ներկայացուցիչները, քանի որ ինքնաթիռը պատկանում էր ընկերությանը:

Հիշեցնենք, որ Air France ավիաընկերության Ռիո դե Ժանեյրո-Փարիզ չվերթը կատարող A330 ինքնաթիռը թռիչքից մի քանի ժամ անց մտել է ամպրոպի գոտի եւ նրա հետ կապն ընդհատվել է: Ինքնաթիռն ընկնել է Ատլանտյան օվկիանոսը, սակայն ճշգրիտ վայրը մինչ օրս որոշված չէ: Որոնողական աշխատանքների արդյունքում հնարավոր է եղել հայտնաբերել մի քանի բեկորներ եւ 50 զոհվածի դիակներ:

«Սեւ արկղերը» հայտնաբերելու փորձերը նույնպես ձախողվել են: Մարտի 20-ին չորրորդ փորձն է ձեռնարկվելու:

Վարկածներից մեկի համաձայն` վնասված է եղել ինքնաթիռի սարքերից մեկը` Պիտոյի խողովակը, որը չափում է թռիչքի արագությունն ու բարձրությունը, եւ օդաչուները սխալ տվյալներ են ստացել:

Ի դեպ, Airbus-ի փաստաբանը հայտարարել է, որ Air France и Airbus 12,5 մլն դոլար են հատկացնելու ինքնաթիռի «սեւ արկղերի» որոնողական աշխատանքներին: