Հայտնաբերվել է մանկապիղծների խոշոր ցանց

ԵՄ մի քանի երկրների ոստիկանական ուժերի մասնակցությամբ իրականացված «Փրկություն»  գործողության արդյունքում բացահայտվել է մանկական պոռնոգրաֆիայի խոշոր միջազգային ցանց, տեղեկացնում է BBC–ն։

Գործողությանը մեծ աջակցություն է ցուցաբերել Օնլայն շահագործումից երեխաների պաշտպանության կենտրոնը (CEOP)։

Ոստիկանները Իտալիայում, Նոր Զելանդիայում, Նիդերլանդներում, Կանադայում, Թաիլանդում եւ աշխարհի այլ երկրներում ձերբակալել են 184 չարագործի, որոնցից 121-ին` Մեծ Բրիտանիայում:

Նրանք օգտագործել են մի օրինական ինտերնետային կայքի ֆորում, ծանոթություններ են հաստատել դրա մասնակիցների հետ և կայքի փակ հատվածում կամ էլեկտրոնային փոստի միջոցով նրանց փոխանցել երեխաների հանդեպ բռնությունների տեսագրություններ կամ լուսանկարներ։

Եվրոպոլի ղեկավար Ռոբ Ուենրայթի խոսքերով՝ գործողությունը շարունակվում է, և սպասվում են նոր ձերբակալություններ։