Ներկայացնելու են գնահատման առաքելության զեկույցը

ԵԱՀԿ Մինսկի խմբի համանխագահները տարածաշրջանային այցի ընթացքում Հայաստանի եւ Ադրբեջանի նախագահներին են ներկայացնելու ԼՂ հարցով գնահատման առաքելության զեկույցը: Այդ մասին, ըստ 1news.az-ի, տեղեկացրել է այսօր Բաքու ժամանած ռուսաստանցի համանախագահ Իգոր Պոպովը:

Նրա խոսքերով` մյուս համանախագահները եւս շուտով կլինեն Բաքվում: Ղարաբաղյան հակամարտության կարգավորման բանակցություններն Ադրբեջանի իշխանությունների հետ կանցկացվեն վաղը:

Ադրբեջանական կայքը տեղեկացնում է, թե դրանց ընթացքում քննարկվելու է նաեւ Աղդամի 9-ամյա բնակչի սպանության հարցը:

Պոպովը տեղեկացրել է, որ համանախագահները Երեւանում կլինեն մարտի 16-ին, նաեւ հայտնել է, որ Լեռնային Ղարաբաղ այցելել-չայցելելու մասին դեռ ճշգրիտ տեղեկատվություն չունի: