Հետընթացը հաղթահարվում է

«Հայաստանի հարկային եւ մաքսային ռեժիմում բարեփոխումները պարտադիր են` գործարար միջավայրը բերալավելու համար, որը պետք է կատարվի օրենքի գերակայության ամրապնդման միջոցով»,- այսօր լրագրողների հետ հանդիպմանն ասաց Վերակառուցման եւ զարգացման եվրոպական բանկի գլխավոր տնտեսագետ Էրիկ Բերգլոֆը:

Անցումային շրջանի հերթական` 2010 թվականի զեկույցը ներկայացնելիս, նա նշեց, որ մեր երկրի տնտեսությունը շարունակում է վերականգնվել` 2009 թ-ին ունեցած ծանր հետընթացից հետո, երբ արտադրությունը նվազեց 14.2 տոկոսով նախորդ տարվա համեմատությամբ:

Անցյալ տարի գրանցված 2.6 տոկոս աճից հետո ակնկալվում էր, որ երկրի տնտեսությունը 2011-ին կընդլայնվի 4.5 տոկոսով: Ըստ զեկույցի` վերականգնումը բացատրվում է դրամական փոխանցումների ներհոսքի, մեծավալ պաշտոնական ֆինանսավորման եւ պղնձի գնի վերականգնմամբ:

Թեեւ այս ամենը փաստ է, սակայն դեռ չի նշանակում, թե բարեփոխումներն ավարտունացվել են: Տնտեսագետը  նշեց, որ բիզնեսի ընդլայնմանը խոչընդոտող խնդիրներն են  չափազանց շատ բյուրոկրատական քաշքշուկները, հարկային վատ վարչարարությունը եւ հմուտ աշխատուժի բացակայությունը:

Մեծ խոչընդոտ է նաեւ կոռուպցիան, որը մեզ մոտ, ըստ բանախոսի, 1995 թվականից այս կողմ աճել է: Եվ տարածաշրջանային երկրներից միայն Վրաստանն է կարողացել որոշակիորեն պայքարել դրա դեմ:

Էրիկ Բերգլոֆի խոսքերով ճգնաժամից Հայաստանը դասեր կարող էին քաղել, սակայն այդ դասերը լավ չեն սերտվել. «Հայաստանը նույնպես նման էր մի մեծ պղպջակի, որը ճգնաժամի ժամանակ պայթեց»:

Իսկ ներկայումս  տնտեսության վիճակը բարելավելու եւ բիզնեսի ընդլայնումը խթանելու համար կառավարությունը պետք է անհրաժեշտ քաղաքական քայլեր ձեռնարկի` բարեփոխումների ընթացքն արգացնելու համար, ինչը  հնարավորություն կտա երկրին ունենալ ավելի աշխույժ, կայուն աճ:

Ինչ վերաբերում է ներկայումս առկա գնաճին եւ այն զսպելուն, տնտեսագետը նշեց, թե գնաճային այս «շոկը» առկա է նաեւ տարածաշրջանային մյուս երկրներում, այն միայն հայաստանյան խնդիր չէ: Սակայն այս գնաճը ժամանակավոր բնույթ ունի եւ ՀՀ Կենտրոնական բանկն էլ այն  զսպելու ճիշտ գտործիքներ է ընտրել: